Policija je raščistila jedno od najvećih i najstarijih romskih naselja u Francuskoj, u blizini autoputa nedaleko od Pariza, rekli su danas zvaničnici.
Evakuacija od oko 200 ljudi počela je danas u 12 sati i trajala je dva i po sata, rekao je Ugo Bezanseno, generalni sekretar regiona Sen Deni, sjeveroistočno od Pariza.
Oko 60 žena, djece i lica sa invaliditetom prebačeno je u privremeni smještaj, dok su drugi dobili hotelske vaučere.
Bezanseno je rekao da su stanovnici imali na raspolaganju šest mjeseci da se pripreme za evakuaciju, od odluke suda prošlog februara. Policija je dala posljednje upozorenje u utorak, 25. avgusta, prenosi AP.
Prema nekim procjenama, hiljade Roma žive u Francuskoj i često su meta diskriminacije i evakuacija. U njihovim naseljima nema struje ni vode.
Ovo naselje bilo je jedno od najvećih i najstarijih u Francuskoj sa oko 300 stanovnika, većinom Roma iz istočne Evrope.
