Kako javlja agencija Rojters, u Kairu je jutros odjeknula snažna eksplozija, nekoliko sati pred početak dvodnevnog referenduma o novom ustavu.
Prelazna vlada je donijela odluku o održavanju referenduma kao prvi od nekoliko plebiscita kojima, kako je najavila, treba da bude ponovo ustanovljen izborni sistem do kraja godine. Mnogi analitičari i političari referendum o novom ustavu ocijenjuju kao test popularnosti načelnika generalštaba Abdela Fataha al-Sisija, koga vide kao nasljednika svrgnutog predsjednika Mohameda Morsija.
Novi ustav, ukoliko ga podrže građani na referendumu, zamijeniće ustavni akt koji je svrgnuti predsjednik potpisao prije nešto više od godinu dana, prethodno odobrenom na referendumu.
Agencije javljaju da će dokument biti “očišćen” od islamističkog jezika, a ono što je mnogo važnije - biće ojačane državne institucije koje su se suprotstavljale Morsijevom režimu - vojska, policija i sudstvo.
Ustavom će biti pružena jača podrška ultraortodoksnoj islamističkoj partiji Nur, koja je podržala Morsijevo skidanje sa vlasti, zatim zvaničnom islamskom establišmentu Al-Azhar - religioznoj osnovi sunita, ali i hrišćanskoj Koptskoj crkvi, čije odnose sa vlašću u Morsijevo vrijeme su obilježile tenzije.
