Dostupni linkovi

logo-print

U ponedjeljak otvaranje grčkih banaka, Varufakis tvrdi 'reforme će propasti'


Ljudi čekaju na red ispred bankomata, Atina, 17. juli 2015.

Ljudi čekaju na red ispred bankomata, Atina, 17. juli 2015.

Banke u Grčkoj, zatvorene od 29. juna, ponovo će biti otvorene u ponedjeljak, mada će klijenti banaka i dalje imati određena finansijska ograničenja u podizanju novca u gotovini, saopšteno je u subotu u Atini.

Grci su tokom tri sedmice mogli podići samo 60 eura dnevno na bankomatima. Od ponedjeljka to ograničenje će biti smanjeno, drugim riječima, moći će u jednom danu da podignu više novca, ali ne više od 420 eura sedmično, navodi se u objavljenom zvaničnom dekretu.

Klijent neke banke će moći u ponedjeljak da podigne 120 eura odjednom, umjesto po 60 eura u ponedjeljak i utorak.

Grci će moći da ponovo koriste svoje kreditne kartice za kupovinu u inostranstvu, dodaje se u proglasu.

Nakon odluke Skupštine Grčke u srijedu u ponoć da podrži sporazum Vlade s povjeriocima države iz Eurogrupe, uz niz novih mjera štednje i reformi što je uslov za novi, treći program kreditne pomoći, grčke banke su dobile podršku Evropske centralne banke (ECB) za hitno finansiranje likvidnosti od 900 miliona eura sedmično.

Janis Varufakis

Janis Varufakis

Istovremeno, u intervjuu za BBC bivši grčki ministar finansija, Janis Varufakis (Yanis Varoufakis), rekao je da će reforme u Grčkoj propasti.

Varufakis je kazao da je Grčka "podvrgnuta programu" koji će ući u udžbenike istorije kao "najveća propast makroekonomskog upravljanja".

On je naglasio da će taj program propasti bez obzira ko preuzme na sebe da ga primjeni.

"Taj program je, zapravo, već propao", rekao je Varufakis.

Inače, novi ministri u vladi grčkog premijera Aleksisa Ciprasa (Alexis Tsipras) položili su u subotu zakletvu pošto su iz vlade izbačeni "neposlušni" ministri i nakon što je počela nova faza pregovora za treći paket pomoći Atini.

Novi ministar energetike je Panos Skurletis (Panos Skourletis). On će zamijeniti Pagijotisa Lafazanisa (Panagiotis Lafazanis), dok je novi ministar rada Jorgos Katrugalos (Giorgos Katrougalos).

Za novog zamjenika ministra finansija imenovan je Trifon Aleksijadis (Trifon Alexiadis). Euklid Cakalotos (Euclid Tsakalotos), koji je postao novi ministar finansija 6. jula kao zamjena Varufakisu, zadržao je svoj portfelj.

Skurletis je rekao da rekonstrukcija predstavlja "prilagođavanje vlade novoj realnosti".

"Naš cilj je da isposlujemo dobre uslove sporazuma, ne samo da ga zapečatimo. U tekstu postoji mnogo dvosmislenih termina i to se mora razjasniti, kao i njegova primjena", rekao je novopostavljeni ministar rada Katrugalos.

On je dodao da će se vlada boriti za "socijalno pravedan" sporazum, odbacivši sugestije da će vlada morati da se suoči sa snažnim radničkim sindikatima i uličnim protestima.

"Ljevica podržava demonstracije. Ljevica želi ljude na ulicama", rekao je Jorgos Katrugalos.

Grčki premijer Aleksis Cipras smijenio je u petak ministre, koji su glasali protiv reformi koje su zahtijevali međunarodni kreditori u zamjenu za paket pomoći.

U pomoć stiže međunarodni tim

Džozef Štiglic

Džozef Štiglic

Ugledni ekonomista, dobitnik Nobelove nagrade Džozef Štiglic (Joseph Stiglitz) istakao je da je spreman pomoći u rješavanju grčke ekonomske krize, te da priprema tim vodećih američkih i evropskih stručnjaka koji će učestvovati u tome.

Štiglic je ovo rekao u petak na sastanku sa grčkim ministrom finansija Euklidom Cakalatosom u Atini, saopštila je press služba grčkog Ministarstva finansija.

Američki ekonomista je na ovom sastanku izrazio zabrinutost zbog ekonomske održivosti novog sporazuma koji je Atina postigla sa međunarodnim kreditorima 13. jula.

Štiglic je u više navrata kritikovao taktiku međunarodnih kreditora prema Atini i strukturu aktuelnog finansijskog sistema u Grčkoj koji je nastao kao rezultat te politike.

On je rekao da je spreman sa evropskim i američkim stručnjacima da pomogne grčkoj vladi na svaki način da se okonča politika mjera štednje i da se zemlja oslobodi ekonomske krize.

Grčka je nakon maratonskih pregovora 13. jula u Briselu pristala na mjere štednje u zamjenu za trogodišnji zajam od 86 milijardi eura.

  • 16x9 Image

    Zvjezdan Živković

    Magistar komunikologije. Izvještava o kulturi, socijalnim temama i eurointegracijama. Kreira multimedijalne sadržaje i uređuje portal Balkanskog servisa RSE.

Prikaži komentare

XS
SM
MD
LG