Italijanske mreže organizovanog kriminala godišnje zarađuju oko 10,5 milijardi eura, što je znatno manje od dosadašnjih procjena, navodi se u novom izvještaju čiju je izradu zatražila vlada.
Prihodi mafije su na nivou od oko 0,7 posto italijanskog društvenog proizvoda, piše u izvještaju istraživačkog centra "Transkrajm".
Milanski Univerzitet Bokoni prošle godine je procijenio da kriminalci godišnje u svoje džepove strpaju oko 10,9 posto italijanskog društvenog proizvoda, prenio je Rojters.
"Kriminal donosi znatno manju zaradu nego što se misli. Potrebno je da eliminišemo ideju o tome da mafija odnosi deset posto društvenog proizvoda", izjavio je šef "Transkrajma" Ernesto Savona, ali nije objasnio otkud tolika razlika u procjenama.
Njegov centar je u istraživanju koristio statistike iz pravosuđa, podatke o pranju novca i utaji poreza, policijske izvještaje i informacije o pljenidbi imovine.
Mafija koristi italijansku privrednu recesiju i pozajmljuje novac firmama koje ne mogu da dobiju kredite od banaka, jer često ni ove finansijske institucije nemaju dovoljno novca.
